Ukraina ealisi 37 million 289 biñ insan oldı, dep bildirdi Nazirler şurasınıñ naziri Dmıtro Dubilet. O, 2019 senesi dekabrniñ 1-ne qadar yapılğan elektron cedvelge aluv neticelerini taqdim etti, dep haber ete Azatlıq Radiosı.
Olardan – 20,01 mln qadın ve 17,28 mln erkek. Cedvelge aluv malümatına köre, 14 yaşına qadar balalarnıñ sayısı Ukrainada 5,756 mln teşkil ete, 15 yaşından 24 yaşına qadar insanlarnıñ sayısı – 3,584 mln, 25 yaşından 54 yaşına qadar – 16,458 mln, 55 yaşından 64 yaşına qadar – 5,243 mln, 65 yaşından ve ondan üstün – 6,248 mln.
Ukrainanıñ paytahtı Kyivde 3,7 mln insan yaşay.
Dubiletniñ Telegramda aydınlatqan vesiqasında aytılğanına köre, cedvelge aluv vaqtında üç usul qullanıldı:
- eali sayısına qarışıq qıymet kesüv usulı (cep telefonı operatorlarınıñ malümatı, ev saipleri statistik tedqiqatlarınıñ malümatı, cedvellerniñ malümatı)
- eali sayısına qarışıq qıymet kesüv usulı (ealiniñ cınsiyet ve yaş malümatı ve cedvellerniñ malümatı)
- eali sayısına cedvel qıymet kesüv usulı.
Ükümetniñ bildirgenine köre, bütün usullar boyunca ealiniñ cedvelge aluvınıñ neticelerinde eñ çoñ 2,86% hata bar.
Dubiletniñ aytqanına köre, Nazirler şurası 2020 senesi eali cedvelge alınacaqmı-yoqmı daa qarar almadı. Bu qarar eki-üç ay içinde qabul etilecek.
Devlet statistika hızmetiniñ malümatına köre, 2019 senesi dekabrniñ 1-ne qadar Ukraina ealisiniñ sayısı 41,9 mln insannı teşkil ete.
