Rusiyeniñ Ukrainada yapqanları, hususan Qırım işğali, Donbastaki istilâsı ve halqara añlaşmalarnıñ bozuluvı «olmaycaq şeyler» degil. Bu aqta Ukrainanıñ Poloniya elçihanesi Poloniya «Birdemliginiñ» sabıq lideri, Poloniyanıñ sabıq prezidenti ve Nobel laureatı Leh Valensanıñ aytqanlarına cevap berip Twitterde qayd etti.
«Halqara uquq bozuluvı, Qırım işğali, Donbasta ukrainalılarnı öldürüv, qırımtatarlarğa qarşı repressiyalar çetke qoyulacaq «olmaycaq şeyler» degil. İlk evelâ Putin onıñnen «barışıq quruluvı» aqqında laf etmege başlasınlar dep, böyle areketlerini toqtatmalı», – dep qayd etti elçihane.
Valensa TASS Rusiye haber agentligine intervyü berip, Rusiye «kelecekni tüşüngen bütün qurulışlarğa mümkün olğanı qadar tez kirmeli», dep ayttı. Onıñ qayd etkenine köre, o, Rusiye prezidentinen «yahşı munasebetler» olmasını istey, Putin «dünyağa kerek olğanı» içün «olmaycaq şeylernen» oğraşmamalı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
