Rusiye tarafı, Azaq deñişçinde balıqçılar bulunğan ukrain gemisiniñ FSB tarafından zapt etilüvi aqqında alâ daa malümat bermedi, dep bildirdi Ukraina devlet sıñır hızmetiniñ reisi Andriy Demçenko «Ukrinform» agentligine.
«Rusiye tarafı ukrainalılar bulunğan geminiñ zapt etilüvi aqqında alâ daa bildirmedi», – dedi Demçenko.
Onıñ tahminlerine köre, ukrainalılar bulunğan gemi deñizge daimiy bulunğan yerden farqlı bir yerden çıqqanına oşay. Demçenkonıñ qayd etkenine köre, Azaq deñizi eki memleket arasında iç deñiz ola ve bu meseleni zorlaştıra.
Qırım ve Aqyardaki Rusiye FSBsiniñ idaresi fevralniñ 15-nde Azaq deñizinde dört Ukraina vatandaşı bulunğan gemi tutulğanını bildirdi. Rusiye kontrolindeki Qırım ombudsmeni Larisa Opanasük ukrain gemisiniñ taqımı Azaq deñizinde 48 saatqa tutuldı, dep ayttı.
Ukraina Devlet sıñır hızmetiniñ kütleviy haber vastaları ile bağ meseleleri bölüginiñ reberi Andriy Demçenko Qırım.Aqiqatqa izaat berip, müessise, Azaq deñizinde dört Ukraina vatandaşı bulunğan gemi Rusiye quvetçileri tarafından tutulğanını teşkere, dep bildirdi.
Daa soñra FSB, Azaq deñizinde tutulğan geminiñ kapitanı sorğuda qabaatını tanıdı, dep bildirdi.
Ukraina telükesizlik hızmetiniñ qarşı casuslığı, Rusiye FSBsiniñ hadimleri tarafından Azaq deñizinde balıq tutqan Ukraina vatandaşlarına qarşı halqara uquq normalarınıñ bozuluvını qayd ete, dep bildirgen edi.
Soñki vaqıtları Qara deñiz Azaq deñizi ve Keriç boğazı kibi vatandaş gemileri ve Ukraina arbiy deñizcileriniñ areketleri içün telüke olğan Rusiye arbiy-deñiz flotu ve diger deñiz birleşmeleriniñ faal areket yerleri oldı.
