Ukraina Devlet Sıñır Hızmeti, ilhaq etilgen Qırımğa qanunsız kirgenlerinde şübelengen dört binden çoq adam olarnıñ nezareti altında olğanını haber etti.
Bunı Ukraina Devlet Sıñır Hızmetiniñ matbuat ile alâqası içün mesuliyetli bölükniñ başı Andrey Demçenko Qırım.Aqiqat Radiosınıñ efirinde ayttı.
"Şimdilik 4000-den ziyade adam nezaretimiz altında buluna. Kiriş yasaqlarını alğanlar aqqında aytqanda, yasaqnı tek onı bergen organ lâğu ete bile", - dedi o.
Demçenko, Qırımğa Ukrainanıñ qıta qısmı ve ilhaq etilgen yarımada arasındaki sıñırdan kirilmeğen ziyaretler qanunsız sayıla, dep hatırlattı, çünki Nazirler Kabinetiniñ qararına köre, yarımdada başqa kiriş-çıqış noqtaları çalışmay.
O qoştı ki, Ukraina vatandaşları da işğal etilgen topraqlarğa olğan qanunsız kirişler aqqında Sıñır Hızmetine haber ete bile.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
