Rusiye akimiyeti tarafından arbiy talimler keçirmek bahanesi ile aprelniñ 20-den 24-ne qadar Qırım ve Qara deñizniñ ayrı bölgeleri üzerindeki semanıñ qapatılması büyük bir kerginlikke doğru adım kibi körünmey. Bu fikrini Qırım.Aqiqat Radiosınıñ yaynında Ukraina Devlet ava hızmetiniñ sabıq başı Denis Antonük ayttı.
«Menimce, dört künlük müddet tam büyük kerginleşme olmaycağını köstere. Bu, daa çoq adiy ses-şamata ve ruslarnıñ iş usulları... Qırım üzerindeki ava boşluğını dört künge qapatmaq, diger büyük bir cedvelden eñ qanunsız qarar degil», – dedi o.
Denis Antonük ayrıca Ukrainanıñ halqara uquq ceetinden bu kibi qanunsız sıñırlavlar içün aslında Rusiyeni mesüliyetke çekip olamay, dep şiyaket etti.
«Öz tarafımızdan yalıñız yaza bilemiz, bu meseleni yalıñız bütün seviyelerde – ICAO ve diger organlarda kötere bilemiz – ancaq ahır-soñu iç bir şey olmay. Ukrainanıñ itibarı Rusiyeniñ itibarı ile qıyaslanmaz derecede küçük. Esas – paradır. Aviatsiya dairelerinde iç bir kimse Rusiye ile tutunmaycaq, er kes anda uçmaq istey», – dep qayd etti o.
Aprelniñ 20-nde, salı künü, bir sıra Rusiye ve Ukraina haber vastası, Rusiye aprelniñ 20-den 24-ne qadar Qırım ve Qara deñizniñ ayrı bölgeleri üzerindeki semanı qapatqanı aqqında haber etti.
