BM Baş Assambleyasınıñ komitet toplaşuvında Ukraina Rusiyeni ukrainalılarnı, hususan qırımtatarlarnı azat etmesine çağırdı.
«Ukraina Rusiye tarafından qanunsız tutulğan bütün Ukraina vatandaşlarınıñ, hususan qırımtatarlarnıñ – cemaat jurnalistleriniñ acele azat etilüvine çağırdı», – dep aytıla Ukraina missiyasınıñ Twitter haberinde.
Bu afta Ukraina prezidenti Volodımır Zelenskıy, dünya Rusiye işğal etken Qırımnı unutmamalı, çünki anda qırımtatarlar taqip etile, dep ayttı.
Ukraina akimiyeti, Qırımtatar Milliy Meclisi ve aq qorçalayıcı teşkilâtlar Qırımdaki taqipler ve aq bozuluvı aqqında muntazam sürette ayta. Kreml ise bunı inkâr ete.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
