Link açıqlığı

Ukraina baş prokuraturası Qırımda yaqalanğan ukrain kinorejisöyorı Оleg Sentsovnıñ qoruvı boyunca qararlar almağa devam ete.

Halqara konventsiyalarğa köre, Rusiye Federatsiyasınıñ Baş prokuraturasına muracaat yollanıldı. Oña «lâyıq cevap ve meseleniñ musbet çezilişini» bekleyler.

Bunı Ukraina Baş prokuraturası bildire.

«Ukraina Baş prokuraturası şimdi vaqtınca işğal etilgen Qırım Muhtar Cumhuriyetinde ve Aqyarda Ukraina vatandaşlarınıñ aqları bozuluvı ile vaziyet içün qasevet çeke. Vatandaşlarnıñ uquq ve serbestliginiñ temini Ukraina Anayasasında yazıla, olarnı bozmağa olmay»,– denile beyanatta.

Mında ukrain kinorejissörı Oleg Sentsovnıñ yaqalanuvı ile keñ cemaat rezonansnı qayd eteler. Onı Rusiye uquq qorçalayıcıları diversion-terroristik gruppağa bağlı olğanında, teroristik areketlerniñ etkeninde ve silâ ile qanunsız qullanuvında qabaatlay.

«Devlet organlarınıñ öz vatandaşı ile bağ qurmaq içün etken areketleri Rusiye Federatsiyasında körmemezlikke urıla»,– deyler baş prokuraturada.


Oleg Sentsovnı ve Ukrainanıñ daa üç vatandaşını Rusiye FSB hadimleri Qırımda mayıs ayında yaqaladılar. Gennadiy Afanasyevni, Aleksey Çirniyni, Aleksandr Kolçeni ve Sentsovnı Yalta, Aqmescit ve Aqyarda teraktlarnıñ azırlanuvında qabaatlaylar. Episini «Pravıy sector» teşkilâtınıñ azası olaraq adladılar.

Sentsovnı Moskva SİZOsına yolladılar. Rejissörnıñ adliyecileri FSB hadimleri Sentsovğa ruhiy ve bedeniy zulumnı köstergenlerini qayd eteler.

Oleg Sentsovnı azat etmek talapları ile Rusiye prezidentine belli kinorejissörlar Pedro Almodovar, Bertran Tavernye, Ken Louç, Ancey Vayda, Kşiştof Zanussi ve digerleri muracaatta bulundılar.

Sentsovnıñ eki çağına yetmegen balası bar.
XS
SM
MD
LG