Link açıqlığı

Rusiye FSB hadimleri jurnalistlerni nezaret ete ve Qırımda söz serbestligini yoq etmege tırışa.

Bunı Ukraina baş prokurorı vazifelerini eda etken Oleg Mahnitskiy Gazeta Wyborcza Poloniya neşiriniñ mühbiri Vatslav Radzivinoviçniñ ukrain zenaatdaşlarınen beraber Aqmescitte yaqalanmasını izaatlar eken, bildirdi, dep haber ete Ukrainskaya pravda.

«Jurnalistlerni yaqalav – çorlandırıcı ve aqılğa uymağan bir şey», – dep ayttı Mahnitskiy.

Onıñ aytqanına köre, FSB Radzivinoviçni 6 saat tutıp, onıñ şahsiyetini belgilediler, lâkin olarnıñ böyle bir aqqı yoq edi, çünki jurnalistniñ bütün kerek vesiqaları bar edi.

«Rusiye mahsus hızmetleriniñ areketleri vaqtınca işğal etilgen ukrain territoriyasında meşur Poloniya neşiriniñ vekiline faaliyetini bozmaqnen bağlı. Ukraina Baş prokuraturası bu vaziyette kerek olğan areketlerge başlaycaq», – dep qayd etti Mahnitskiy.

Cumaertesi künü, mayıs 17-de, Aqmescitte FSB hadimleri «Gazeta Wyborcza» mühbiri Vatslav Radzivinoviçni yaqaladılar. Jurnalistni qanunsız alda sıñırdan keçüvde qabaatlap, bir qaç saat devamında militsiya bölüginde tuttılar.

Bazar künü, mayıs 18-de, Aqmescitte meşur Qırım jurnalisti Osman Paşayev, onıñ operatorı ve daa bir qaç jurnalistni yaqaladılar. Paşayevni Aqmescitte Merkeziy rayon militsiyasına alıp kettiler. Jurnalist bir qaç saat devamında suallerge cevap berdi. Onıñ advokatnı çağırmaq muracaatlarına qulaq asmadılar. Yaqalanğanlarnı şamarladılar. 10 saatten soñ Paşayev ve onıñ zenaatdaşlarını azat ettiler.
XS
SM
MD
LG