Ukraina baş naziri Denıs Şmığal ve Türkiye prezidentiniñ yardımcısı Fuat Oktay körüşip, qırımtatarlar içün ev quruv meselesini muzakere ettiler, dep bildirile dekabrniñ 1-nde Ukraina ükümetiniñ saytında.
Matbuat hızmetiniñ malümatına köre, Ukraina baş naziri Türkiyege kerçekleştirgen iş ziyareti vaqtında Rusiye işğali sebebinden yarımadanı terk etmege mecbur olğan qırımtatarlar içün ev qurucılığı saasında Türkiye ile işbirligi başlağanını qayd etti.
«Şimdi evler qurulacaq yerlerni ve er birinde olacaq daire sayısı meselesini baqamız, soñra añlaşmanıñ final versiyası azırlanacaq. Bu müim leyhanı amelge keçirmek içün metinleriniñ keliştirilmesini bekleymiz», – dep qayd etti Denıs Şmığal.
Haberde qayd etilgenine köre, «Fuat Oktay, Türkiye Ukraina suvereniteti ve topraq bütünligine qol tuta ve Qırım ilhaqını tanımay, dep qayd etti».
Türkiye prezidenti Recep Tayyip Erdoğan, Ukraina prezidenti Volodımır Zelenskıynen 500 qırımtatar qorantası içün ev qurucılığı aqqında añlaştı, dep bildirgen edi. Daa soñra Türkiye eyyeti Herson ve Geniçeskte topraq baqıp sayladı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
