Link açıqlığı

Ukraina baş naziri Arseniy Yatsenüк Qırım sakinlerine em göñüllerinde, em de pasportlar boyunca ukrain olaraq qalmağa rica ete.
«Ukrainskaya Pravda» haber etkenine köre, «Şuster LIVE» yayını devamında oña tul qadın, eki balasınıñ anası olğan Qırım sakini muracaat etti.
Qadın Yatsenükten işğal olunğan Qırım Cumhuriyetinde Rusiye grajdanlıqnı qabul etmegen, ve bu sebepten, onıñ fikirine köre, Qırımda yaşamaq ve iş tapmaq meselelerinde qıyınlıqlarnen rastkelgen Qırım sakinlerine özlerini nasıl alıp barmaq kerekligini soradı.

«Rusiye pasportını almaqtan başqa çarem qalmay», – qayd etti o.

Yatsenük, öz nevbetinde, oña ukrain olaraq qalmağa rica etti.

«İnsanım, aytqanıñıznı añlayım. Aqiqatnı ayttıñız. Amma sizge ricam bar: Rusiye pasportını almañız, Ukrain vatandaşı olaraq qalıñız. Biz er bir Ukrain vatandaşına em maaş, em içtimaiy ödevlerini berermiz. Bu endi ar-namus meselesidir. Ukrain olaraq qalıñız, lütfen. Rica etem», – dep qoştı o.

Bu fikirge cevap olaraq qadın öz vatanperverligini kösterip, böyleliknen işsiz qala bilecegini ve neticede öz 11 yaşında olğan qızçığınıñ isteklerini yerine ketirmege imkânı olmaycağını ayttı.

Nazirler Kabinetiniñ başı, öz nevbetinde, balanı Kiyevge tasil almaq içün davet etti.

«Siziñ fikriñiz, sizge tevsiyeler bermege aqqım yoq. Siziñ taqdiriñiz ve siz qarar almaq kereksiñiz, menim vazifem ise sizge teklifnen buyurmaq ve muracaatta bulunmaqtan ibarettir. Nasıl bir qarar alsañız, o, demek, doğru olur, çünki o sizinki. Ve siz soñ öz-özüñizge: «Aqlı edimmi ya yoq» degen sualini qoyarsıñız», – dedi Yatsenük ve Qırım talebelerini qıtaviy Ukrainanıñ oquv yurtlarına keçirüv ceryanınıñ qolaylaşqanı aqqında da hatırlattı.

«Sizgе, balañızğa rica etem, Ukrainanı ne canıñıznen, ne pasportıñıznen qaldırmañız», – dedi Yatsenük.
XS
SM
MD
LG