Karantin bitse bile, Ukraina koronavirus ile küreşine devam etecek. Bu aqta Ukraina baş naziri Denıs Şmığal «RBK-Ukraina» neşirine bergen intervyüsında ayttı, dep bildire Azatlıq Radiosı.
«Dünya sağlıq teşkilâtı tenbiley, ve biz razımız, kelecek eki yıl devamında bu hastalıq ile küreş ve insanlarımıznıñ ayatı ve sağlığını saqlav şaraitlerinde yaşaycaqmız. Mayısta karantin biter ve epimiz çıqıp unutacaqmız, dep tüşünmemelimiz», – dep qayd etti Şmığal.
Onıñ aytqanına köre, hastalıqnıñ birinci basamağı keçken memleketler «bugün nevbetteki basamaq bosağasında tura».
«Qıtayda bile tekrar dalğa oldı. Birinci dalğası keçken diger memleketlerde de bugün hastalıqnıñ ekinci dalğası qayd etile. Ukraina birinci dalğanı yeñdi ve er şey güzel dep tüşünmeñiz. Yañı şaraitlerde yaşamağa ögrenmelimiz», – dep qoştı baş nazir.
Aprelniñ 22-ne qadar Ukrainada 6592 COVID-19 hastası qayd etildi. Aprelniñ 21-i devamında 467 yañı hasta aqqında haber etildi. 424 insan endi tüzeldi, 174-ü vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
