Azaq deñizinden Keriç boğazına keçken suvastı aquvlar ve buz areketi Keriç köprüni boza bile, dep bildirdi Ukraina Arbiy-deñiz quvetleriniñ komandanı İgor Voronçenko Radio Svobodanıñ «Nastoyaşçeye Vremâ» telekanalına.
Onıñ aytqanına köre, Keriç köprü içün bu regionda ara-sıra olğan yer teprenüvleri zararlı olacaq.
«Yedi yıl anda hızmet ettim, Azaq ne olğanını, Qara deñiz ne olğanını bilem. Bu eki umumiy tas, Azaqtan aquvlar pek ciddiy ola. Olar şimdi qapatıp, köpürniñ altında diffuzor yapqanlar, ayaqlarğa suv urula. Keriçte er yıl zelzele ola, küçü 4-5. Bütün bular qazıqlarğa tesir ete», – dedi Voronçenko.
Onıñ qayd etkenine köre, ava suvuq olğanda Azaq deñizi buzlap qala, ve soñra buz Keriç boğazına keçe.
«Yedi yıl içinde eki kere öyle olğan edi. Bu buzlar köpürni yıqacaq. Buzlar bu diffuzorğa kete. Ne olacağını tasavvur etesiñizmi? Tayaqlarnı qoymağa başlağanda biri-birinen qavuştırılmay edi – ya oturğan, ya yañlış esap etilgen edi… Bu köpür yoq olacaq», – dep qayd etti Ukraina arbiy-deñiz quvetleriniñ komandanı.
Mayısnıñ 16-nda rusiyeli memuriyet Keriç boğazı üstünde qurulğan köpürniñ avtoyol qısmı yengil avtomobillerniñ areketi içün açıldı. Köpürniñ demiryol qısmı şimdilik qurulıp bitirilmedi.
Ukraina prezidenti Petro Poroşenko, Rusiye ilhaq etken Qırımda Keriç köpüriniñ qurğanı Kremlniñ halqara uquqqa sayğısızlıq köstergeniniñ nevbetteki misali olğanı aqqında aytqan edi.
Avropa birligi Rusiye ve ilhaq etilgen Qırım arasında qısmen açılğan Keriç köpürini tenqit etken edi. 2014 senesi Qırım ilhaq etilgen soñ, Ukraina Rusiye ile tizilgen köpür qurulışınen bağlı muqaveleden çıqtı.
