Mayısnıñ 11-nde bir sıra Ukraina aliy oquv yurtunda ilhaq etilgen Qırım ve Donetsk ve Lugansk vilâyetleriniñ işğal etilgen qısımlarında yaşağan abituriyentler içün Açıq qapular künü keçirilecek. Bu aqta Ukrainanıñ vaqtınca işğal etilgen topraqları ve memleket içinde köçken şahıslar meseleleri nazirliginiñ Facebook saifesinde haber etile.
Açıq qapular künü aşağıdaki aliy oquv yurtlarında keçirilecek: Donbas devlet maşina qurucılıq akademiyası (Kramatorsk ş.), Vladimir Dal Şarqiy ukrain milliy universiteti (Severodonetsk ş.), Herson devlet deñiz akademiyası (Herson ş.).
Abituriyentlerge ve olarnen beraber kelecek insanlarğa mayısnıñ 10-ndan 12-ne qadar yataqhanede yer berilecek.
2019 senesi qırımlılarğa esas Ukrainadaki aliy oquv yurtlarına oqumağa kirmege imkân berecek «Qırım – Ukrainadır» 35 tasil merkezi çalışacaq.
Ukraina tasil ve ilim nazirligi Qırım ve Donbas abituriyentleri içün adım-adım talimatnı derc etti.
