Kramatorskta gece olğan ava ve raketa ücümi neticesinde eñ az 25 barışıqsever sakin zarar kördi. Bu aqta Donetsk vilâyetiniñ arbiy memuriyet yolbaşçısı Pavlo Kırılenko bildirdi. Altı kişi tibbiy yardımğa muhtac oldı.
Kırılenkonıñ malümatına köre, raketalar doquz mesken evge, mektep ve bir çoq vatandaş infrastruktura obyektlerine zarar ketirdi.
Rusiye Mudafaa nazirligi Kramatorskqa endirilgen darbeler aqqında daa bildirmedi.
Kramatorsk Donetsk vilâyetiniñ şimalinde buluna, bu taraf Ukraina kontrolinde qala. Şeer akimiyetiniñ malümatına köre, şeerde 250 biñ sakinden tahminen beşici qısmı qala.
Aprelniñ 8-nde Kramatorsk vokzalına kerçekleştirilgen raketa darbesi neticesinde 57 insan can berdi. Rusiye darbenen alâqası olğanını inkâr etip, Ukrainanı mesüliyetli dep ayta.
Arbiy ekspert Oleg Jdanov Rusiye ücümi ekinci etapınıñ esas stsenariyi eki yöneliş olacaq, dep tahmin etti – İzümden Kramatorskqa ve Gulâypolâdan Kramatorskqa kene, bu şeerde bir alqa yapmaq içün. «Bu Ukraina gruppirovkasını sarıp alacaq yekâne usuldır», – dep qayd etti Jdanov «Nastoyaşçeye vremâ» telekanalınen subetleşip.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
