Ukraina Adliye naziri Denıs Malüska bildirgenine köre, Ukraina Avropa insan aqları mahkemesinde Qırımnen bağlı «Ukraina Rusiyege qarşı» davasınıñ esasını baqacağını bekley. Bu aqta o, Facebook saifesinde yazdı.
«Şimdi Avropa insan aqları mahkemesiniñ qararını bekleymiz. Bu talaplarnen bağlı qarar olmaycaq, amma aradaki müim bir netice olacaq. Avropa insan aqları mahkemesi qarar çıqarılacaq künni eñ yaqın künlerde saytında aydınlatacaqtır. Avropa insan aqları mahkemesi davanı qabul etse, mahkeme Ukrainanıñ şikâyetini temelden baqıp başlaycaq. Qabul etmese – başqa davalarda cenkleşecekmiz», – dep bildirdi nazir.
Hatırlatamız, aq qorçalayıcılarnıñ malümatına köre, Avropa insan aqları mahkemesi başta Ukrainanıñ Rusiyege qarşı şikâyetini, soñra da Ukraina vatandaşlarınıñ şahsiy şikâyetlerini baqacaq.
Daa evel berilgen malümatqa köre, Kyiv Avropa insan aqları mahkemesinde işğal etilgen Qırımda insan aqlarınıñ bozuluvına dair «Ukraina Rusiyege qarşı» davasında müsbet qarar aldı.
Avropa insan aqları mahkemesinde Rusiye işğal etilgen Qırımda ve Donbasta olıp keçken adise-vaqialarnen bağlı dört biñ dava buluna.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
