Ukraina Tış işler nazirligi Avropa Birligi ile mesleatlarında Qırımnıñ Avropa memleketleri tarafından yañlış qayd etilüv meselesini ve bunı yapqanlar içün uquqiy aqibetlerni muzakere etmege planlaştıra.
Bu aqta Ukraina Tış işler naziriniñ birinci muavini Emine Ceppar Qırım.Aqiqatqa bildirdi.
«Noyabrniñ 23-nde Ukraina Tış işler nazirliginiñ sanktsion siyaseti Mahsus vekili avropalı ortaqlarımıznen mesleatlar vaqtında bu meseleni köterdi. Dekabr ayınıñ ortasında Avropa Birligi ile keçirilecek Rusiye tarafından vaqtınca Qırım işğaliniñ uquqiy aqibetlerinen bağlı mesleatlar vaqtında AB memleketleriniñ işğalni tanımama siyasetini bozmasını muzakere etmege planlaştıramız», – dedi Ceppar.
O, müessise, kütleviy haber vastalarında, neşir, reklama, turistik malümatlarda, harita ve navigatsion sistemalarında Ukraina topraqlarınıñ halqara seviyede tanılğan sıñırlarda qayd etilgenini taqip etmege devam ete, dep işandıra.
«Bundan ğayrı, iş işğal altındaki Qırımnı Rusiye olaraq qayd etken şirketlerniñ ait olğan memleket organlarınen doğru keçirile, bu meseleni AB institutları ile bağ meselelerinde de köteremiz», – dep qoştı diplomat.
Cepparnıñ aytqanına köre, bir çoq adisede müsbet neticeler oldı.
«Şirketler yañlış haritalarnı tüzetken, bazı vaqıtları da mal satışını toqtatqan edi, meselâ, Qırım Rusiye olaraq qayd etilgen Avropanıñ siyasiy haritasını basqan «Studio PLAN» Poloniya neşriyatınen öyle oldı», – dep qayd etti o.
Rusiyede satılğan BMW maşinaları saipleriniñ Qırım Rusiye toprağı olaraq qayd etilgen navigatsion haritanı qoymağa imkânları oldı. Esas versiyasında Qırım Ukraina olaraq qayd etildi. BMW bu qararını «farqlı memleketlerniñ qanunlarına emiyet berilmeli», dep añlattı.
Bundan soñ Ukraina Tış işler naziriniñ birinci muavini Emine Ceppar BMW şirketine halqara qararlar aqqında hatırlattı.
2014 senesi Rusiye Qırımnı işğal etken soñ yarımadanıñ topraq mensüpligi diger maşina şirketleriniñ haritalarında da deñişti. Nissan navigatorı Rusiyede Qırımnı Rusiye olaraq köstere, diger memleketlerde ise – Ukraina olaraq.
Volkswagen de şirket haritaları memleketke köre deñişe bile, dep haber etken edi. Faqat bu şirketniñ halqara ve topraq sıñırlarına olğan munasebetini aks ettirmey, dep işandıra maşina şirketi. Rusiyede Mitsubishi 2014 senesinden berli Qırım Rusiye olaraq qayd etilgen «Yandeks.Navigatornı» qullana.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
