Ukraina, 48 saattan soñ çetel vatandaşları içün sıñırını qapatacaq, dep bildirdi Milliy telükesizlik ve mudafaa şurasınıñ kâtibi Oleksiy Danılov. Bu aqta Azatlıq Radiosı haber ete.
Onıñ aytqanına köre, bu tedbirler şimdilik eki afta devam etecek.
Çetelde olğan Ukraina vatandaşları ise Ukrainağa qayta bile.
«Koronavirus qaynağan» memleketlerden qaytqan vatandaşlar közetilecek.
Bir afta içinde Ukraina sıñırındaki bütün keçiş noqtaları koronavirusnı qayd etken ekspress-testlerinen temin etilmeli, dep qoştı Danilov.
MTMŞ kâtibi, Ukraina vatandaşlarını çetel turistik ziyaretlerinden vazgeçmelerine çağırdı.
Al-azırda Ukrainada üç koronavirus hastası qayd etildi: biri – Jıtomır vilâyetinde, ekisi – Çernivtsi vilâyetinde.
Daa evel Ukraina İç işler naziri Arsen Avakov, işğal etilmegen esas Ukrainada qayd olmağan ukrainalılarnı Donbastaki kontrol keçiş noqtalarından ve işğal etilgen Qırımnıñ memuriy sıñırından keçirmemege teklif etken edi.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
