Rusiyeniñ Ukrainağa qarşı başlatqan ücüminiñ üç künü içinde tahminen 4300 Rusiye askeri öldi. Bu aqta Mudafaa naziriniñ muavini Ğanna Malâr fevralniñ 27-nde saba Facebookta bildirdi.
Bundan ğayrı, onıñ aytqanına köre, üç kün içinde Rusiye Federatsiyasınıñ ordusı 27 uçaq, 26 vertolet, 146 tank, 706 uruş zırhlı maşina, 49 top, bir «Buk», dört «Grad», eki gemi/katerni ğayıp etti.
«Malümat tahminiydir ve tüzetile bile, çünki uruştan soñ malümat almaq pek zor, komandanlar uruşlarğa diqqat etmeli. Bundan ğayrı, malümat tek uruşlar bitken soñ berile, uruşlar ise pek uzun devam ete bile. Malümat ertesi künü, bazı vaqıtları ise bir künden soñ kele bile», – dedi Malâr.
Ukrainada Rusiye ücüm etken soñ arbiy vaziyet ilân etildi. Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Prezident Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
