Link açıqlığı

Ukraina şarqında olğanlar Qırım istilâsına oşap kete – BMTde AQŞ elçisi


Ukraina şarqınıñ altı şeerinde cumaertesi künü ve daa yedi şeerde bazar künü olıp keçken adise-vaqialar Rusiyeniñ Qırımğa istilâ etken birinci adımlarını añdıra.

Bunı Moskva teşebbüsinen ötkerilgen Havfsızlıq keñeşiniñ toplaşuvında Birleşken Milletler Teşkilâtındaki AQŞ elçisi Samantha Power bildirdi.

O, AQŞ ve Avropa Birliginiñ Ukrainadaki zıddiyetni al etmek içün Rusiye ve Ukraina iştiraginen dört taraflı muzakereler keçirmek ıntıluvlarını qayd etti. Böyle bir körüşüv aprelniñ 17-ne planlaştırıldı.

«Rusiye barışıq istese, Ukraina ile sıñırda 40 biñ arbiy adamnı ne içün tuta?», – dep soradı Samantha Power.

Britaniya vekili Mark Lyall Grant soñki vaqialarnı «telükeli vaziyetniñ telükeli kenişlevi» dep adladı.

Bunıñ kibi noqtaiy nazarını Frenkistan, Litva, Ruanda, İordaniya, Avstraliya, Argentina, Cenübiy Körey, Çad ve diger memleketlerniñ vekilleri seslendirdiler.

Qıtay Ukrainadaki vaziyetke nisbeten qasevetini bildirdi. Qıtay elçisiniñ aytqanına köre, Pekin halqara toplulıqnıñ memlekette vaziyetni eyileştirmek ıntıluvlarına qol tuta.

«Bu Ukraina içinde cenk degil, bu Rusiye tarafından aselet planlaştırılğan çatışmadır», – dep ayttı BMTdeki Ukraina elçisi Yuriy Sergeyev. «Biz Ukraina şarqında Rusiye mahsus hızmetleri hadimleriniñ iştiragini isbatlay bilemiz», – ilâve etti o.
XS
SM
MD
LG