Ukraina ükümetiniñ nevbetten tış toplaşuvında işğal etilgen Qırım ve Herson vilâyetiniñ memuriy sıñırındaki bütün kiriş-çıqış kontrol noqtalarınıñ işini yañıdan başlatmağa qarar alındı.
Ukrainanıñ vaqtınca işğal etilgen topraqlar ve reintegratsiya meseleleri nazirligi bildirgenine köre, iyünniñ 15-nden itibaren «Kalançak», «Çonğar» ve «Çaplınka» keçiş noqtaları işine yañıdan başlay.
«Memuriy sıñırdan keçken vatandaşlarnıñ mecburiy observatsiyası lâğu etile, lâkin qırğınlıqqa qarşı talaplarğa riayet etmeleri şart – sıcaqları baqılacaq ve maska ve qolçaq taqılması teşkerilecek. Bundan ğayrı, sıñırdan keçken er kes «Evde areket et» elektron servisini qullanıp, özüni izolâtsiya etmege razı olğanını yazma şekilde bildire. Bu şartnı bozğanlarnı 17 biñ para cezası bekley», – dep aytıla haberde.
Daa evel haber etilgenine köre, işğal etilgen Qırım ve Herson vilâyetiniñ memuriy sıñırında koronavirus tarqaluvı sebebinden kirsetilgen sıñırlav tedbirleri iyünniñ 22-ne qadar uzatıldı.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
