Aqmescitte (Simferopol) avgustnıñ 17-sinde Ukrain medeniy merkezniñ faalleri azırlağan muzıkalı aqşam keçti. Bu UMM-niñ Facebook saifesinde yazılğan.
"Musafirimiz - Tatyana Anişenkoğa pek minnetdarım, o, bizge, Aqmescit gastroline uzaq Keriçten keldi... Tatyana, muzıka ve ukrainlıqnı candan seve, onıñ içün babası 50 yıl evel çalğan bandura ve gitaranı yanına ketirdi", - yazdı faal Olena Popova.
O, medeniy merkez böyle kontsertlernen "Qırımda ukrainlıqnıñ ateşçigini destekley", dep qayd etti.
Qırımdaki Ukrain medeniyet merkezi siyasiy bir teşkilât degil. Onı faaller yarımadada ukrain medeniyetini saqlamaq ve populârlaştırmaq maqsadınen teşkil etken ediler. Bu arada Merkez iştirakçilerine tazyıq yapılmaqta: olar telükesizlik organları tarafından sorğulav ve “subetlerge” çağırıla, ekstremizmge yol berememezlik hususında tenbiylene. Qırımdaki Ukrain medeniyet merkeziniñ faallerinden biri olğan Leonid Kuzmin telükesizlik hadimleri tarafından yapılğan basqı ve qorquzuvlardan soñ 2017 senesi yarımadanı terk etmege mecbur qalğan edi.
Keçken yıl noyabrde Aqmescitte rusiye quvetçileri, Ukrain medeniy merkeziniñ faalcisi Galina Balabannıñ evinde tintüv keçirdi.
