Ukraina faali Larisa Kitayskaya Qırımdan esas Ukrainağa ketti. Bu aqta o, martnıñ 4-nde Qırım.Aqiqatqa haber etti.
«Bir afta evelsi kettim, maddem cinaiy olmaqtan çıqarılğan soñ. Qırımdan raat çıqarğanlar. Anda olarğa keder etkenim içün yibergendirler. Anda ne qanun, ne aq bar, anda er şey ola bile. Qırımda bir daa qaytmam dep tüşünem», – dedi Kitayskaya.
Yanvarniñ 23-nde Rusiye kontrolindeki Yalta şeer mahkemesi ukrain faali Larisa Kitayskayanıñ «içtimaiy ağlardaki ekstremizm» qabaatını lâğu etti.
2018 senesi mart ayında Kreml kontrolindeki Qırım Yuqarı mahkemesi içtimaiy ağlardaki paylaşuvlar içün mahküm etilgen ukrain faali Larisa Kitayskayanıñ ükmüni deñiştirip, şartlı apis cezasını eki ayğa 1 yıl ve 10 ayğa qadar eksiltti. Onı Rusiye Ceza kodeksiniñ 282-nci maddesiniñ 1-inci qısmına (nefret ya da duşmanlıq doğuruv, insan itibarını aşalav) istinaden qabaatladılar.
Kitayskaya ilk sefer 2016 senesi iyülniñ 18-nde Yaltada Rusiye FSBsi hadimleri tarafından tutulğan edi. Bundan soñ dairesinde tintüv keçirildi. 2016 senesi avgustnıñ 12-nde Larisa Kitayskayağa Rusiye uquq qoruyıcıları cinayet işlegeninden şübheli sayılğanına dair vesiqa ve çıquv yasağını berdi. Bundan evel Rusiye kontrolindeki prokuratura Yalta sakinine qarşı cinaiy iş açılğanını bildirdi. O, «internette ruslarğa qarşı nefret ğayelerini» paylaşqan eken.
Qırım Muhtar Cumhuriyetinni prokuraturası Yaltada Ukraina vatandaşınıñ qanunsız tutulması ve eviniñ tintüvinen bağlı cinaiy tahqiqat açtı. Mahkemeden evel tahqiqat Ukraina Ceza kodeksiniñ 146-ncı maddesi (azatlıqtan qanunsız marum etüv) ve 162-nci maddesi (mesken tiyilmemezligi) cinayetlerinen bağlı cinaiy tahqiqat keçirmekte. Malümat Ukraina Baş prokuraturasına berildi.
Rusiye prezidenti Vladimir Putin dekabrniñ 27-nde Rusiye Ceza kodeksiniñ nefret ya da duşmanlıq doğuruv 282-nci maddesiniñ cinaiy olmaqtan qısmen çıqarılmasına dair qanunnı imzaladı.
