Ukrain faali Volodımır Baluh qomşu Rusiyedeki Krasnodarğa avuştırıldı.
Bu aqta Qırımtatar Milliy Meclisiniñ reis muavini Ahtem Çiygoz Facebook saifesinde yazdı.
Fevralniñ 18-nde Qırım aq qorçalayıcı gruppası siyasiy mabüsniñ ömür arqadaşı Natalya Baluhnıñ malümatına esaslanıp, ukrain faali Volodımır Baluhnı Aqmescit SİZOsından avuştırdılar, dep bildirgen edi.
Aq qorçalayıcılar Baluhnıñ advokatı bergen malümatqa esaslanıp bildirgenine köre, Baluh SİZOdan qomşu Rusiyege avuştırıla bile.
«Ukrainağa qoltutqan Volodımır Baluh içün Rusiye koloniyasına avuştırılması – ayatı içün bir telükedir», – dep bildirdi Qırım aq qorçalayıcı gruppasınıñ reberi Olga Skrıpnik.
Aq qorçalayıcınıñ qayd etkenine köre, Baluhnıñ Qırım tışına avuştırılması halqara gumanitar uquqnı bozmaqta.
Al-azırda Ukraina ve Rusiye hızmetleri ve Baluhnıñ advokatı bu malümatnı daa tasdıqlamadı. Qırım.Aqiqat tafsilâtlı malümat almağa tırışa.
Fevralniñ 13-nde Qırım aq qorçalayıcı gruppası, Volodımır Baluh Keriç koloniyasından Aqmescit SİZOsına avuştırıldı, dep bildirge edi.
Aq qorçalayıcılarnıñ malümatına köre, temyiz arizasını Qırım prokurorınıñ muavini Sergey Bulgakov berdi. O, Qırım Muhtar Cumhuriyetiniñ prokuraturasında çalışqan edi, oña qarşı Ukraina Ceza kodeksiniñ 111-inci maddesiniñ 1-inci qısmına istinaden (devlet hainligi) cinaiy tahqiqat başlatıldı.
Kreml kontrolindeki Qırım Yuqarı mahkemesi ukrain faali Volodımır Baluhnıñ imayesine cezası müddetiniñ ğayrıdan baqıluv muracaatını red etti. Kreml nezaretindeki Qırım Yuqarı mahkemesi Volodımır Baluhnı 4 yıl ve 11 ay umumiy rejim koloniyasında qalmasına ve 10 biñ ruble (tahminen 4 biñ ğrıvnâ) para cezasını ödemesine üküm etti. Faal eki cinaiy iş boyunca tevqif etildi.
2018 senesi martnıñ 19-nda Volodımır Baluh açlıqqa başlağan edi. Bir aydan ziyade bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi. Daa soñra mahküm etilgen ukrain faali açlıqnı vaqtınca toqtatmağa qarar aldı. Advokatlarnıñ malümatına köre, 200 künden çoq açlıq tutqan Baluhnıñ ülser ve pankreatit şübesi peyda oldı.
FSB, Volodımır Baluhnı 2016 senesi dekabrniñ 8-nde tuttı. FSB hadimleri Volodımır Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
«Memorial» aq qorçalayıcı merkezi Volodımır Baluhnı siyasiy mabüs olaraq tanıdı. Aq qorçalayıcılarnıñ fikirince, faalni taqip etüv sebebi evinde tiklegen «Sema Yüzü Qaramanları soq., 18» levhası olğan.
