Doquz aydan ziyade Moskova SİZOsında tutulğan ve keçken afta Ukraina-Rusiye almaşuvından soñ azat etilgen Ukraina deñiz askerleri, Moskovada tevqif etilgen Rusiye faali Konstantin Kotov içün para topladı.
Bunı Facebookta deñizcilerniñ advokatlarından birisi Nikolay Polozov haber etti.
Konstantin Kotov çoq vaqıt devamında ukrain deñizcilerine yardım etti. O, yollanmalar topladı, mahkeme oturışlarına qatnadı, ukrain arbiy esirler ve siyasiy mabüsler, ve bunıñ ile qırımtatarlarnıñ destegine keçirilgen piketlerde iştirak etti.
“Ukrain deñizciler azat etilgen soñ, volontör Kostâ Kotovnı türmege oturtqanlarını bildireler. Ve olar, evel özü Kostâ kibi, indemeyip çette qalıp olamadılar”, – dep yazdı Polozov.
Ukrain deñizciler, "olar özleri apishanede bulunğan vaqıt onıñ yapqan destegine minnetdarlıq köstermek içün”, advokatnıñ yazğanına köre, 12 400 grıvnâ (aman-aman 26 000 ruble) topladı.
Avgust ayında – Moskovada olğan narazılıq aktsiyalarından soñ – Kotovnı teqif etip, dört yıllıq apis cezasını üküm ettiler.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı. Oleğ Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
