Menbanıñ malümatına köre, mayısnıñ 6-na keçken gecesi Qara deñiz rayonında Uzkaya körfezi yanında Rusiye quvetleriniñ tez yürgen katerine Magura V5 deñiz dronı ile ücüm etildi.
Başqa tafsilâtlar yoq. Aynı zamanda Qırımnıñ telegram kanalları, gece yarımadanıñ ğarbiy yalısında Qara deñiz yalısında Rusiye arbiy katerlerini nişan etip, Ukrayina Silâlı quvetleriniñ ekipajsız beş katerini yoq etkenlerini bildirdiler.
Resmiy olaraq ne Ukrayina, ne de Rusiye akimiyeti bu malümatnı izaatlamadı.
Aprelniñ 21-nde Aqyarda patlavlar eşitildi. Şeerniñ rusiyeli başı Mihail Razvojayev, Şimaliy tarafta Rusiye gemilerinden birine raketa ücüminiñ toqtatılğanını bildirdi.
Daa soñra "Krımskiy veter" teleqram kanalı bildirdi ki, ücüm neticesinde "Kommuna" qurtarıcı gemisi zarar kördi. Aynı zamanda UASQ spikeri Dmitriy Pletentçuk, onı ğayrıdan tiklemek qıyın olacağını iddia ete edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
