Sentâbrniñ 5-nde gece Ukrayinağa bir qaç on «Şahed» darbe uçucısızı ücüm etti, memleketniñ şimal, şarq, cenüp ve merkezindeki bazı vilâyetlerde telüke devam ete, dep köstere Ukrayina Silâlı quvetleriniñ Ava küçleri malümatı.
«Duşmannıñ darbe dronları ücüm etmege devam ete! Ukrayinanıñ ava boşluğında – bir qaç on. Çoqusı ğarbiy taraftan şimaliy vilâyetlerge kete!», – der bildirdi Ukrayina arbiyleri saat 2:00-lerde.
«Sumı, Çerniğiv, Kiyv, Poltava, Kırovograd vilâyetlerinde «Şahedler»! Mırgorod, Bila Tserkva, Çerniğiv, Sumı içün eñ büyük telüke!» – dep aytıla Ava quvetleriniñ 6:06-daki haberinde.
Ukrayina arbiyleri bu gece Rusiye raketa qullandı, dep bildirmedi.
Rusiye arbiyleri Ukrayina regionlarına çeşit silâlardan muntazam surette ücüm ete. Delil ve şaatlıqlarğa baqmadan, Moskva, tam bir istilâ başlağanından berli, vatandaşlarğa nisbeten yapılğan ücümlerni red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayeti olaraq tasnif etip, belli maqsadları bar, dep qayd ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
