Ukraina Minsk añlaşmalarındaki mecburiyetlerini yañıdan baqmaq niyetinde degil, çünki Rusiye bu añlaşmalardaki öz qısmını yerine ketirmedi. Bunı fevralniñ 2-nde brifing vaqtında Ukraina TİN yolbaşçısı Dmıtro Kuleba bildirdi.
"Minsk añlaşmalarınıñ ömürge keçirilmesine kelgende, menimce, sual başqa türlü berilmeli: Rusiye niayet Minsk anlaşmalarını ömürge keçirmege ne vaqıt başlaycaq? Ne içün daiman, anlaşmalarnıñ ömürge keçirilmesi içün Ukraina bir şeyler yapmaq kerek olğanı aqqında eşitemiz? Ücüm etken biz degilmiz", - dedi nazir.
Kuleba, Üç taraflı kontakt gruppasınıñ işini Rusiye blok etkenini ve devlet başları seviyesinde "Normandiya dörtü" formatında körüşüvlerni keçirmege Rusiye istemegenini qayd etti.
Prezident Ofisiniñ reberi Andriy Yermak, Normandiya formatı memleketleriniñ liderleri mesleatçılarınıñ iştiragi ile yanvarniñ 26-nda Pariste ötkerilgen toplaşuvğa Normandiya formatınıñ ğayrıdan canlandırılması kibi saymaq mümkün olğanını dedi.
