Rusiyeniñ Ukrainağa qarşı kerçekleştirgen ücüminden başlap 121 bala vefat etti, daa 167 bala yaralandı. Bu aqta martnıñ 23-nde Ukraina Baş prokurorı ofisiniñ matbuat hızmeti bildire.
«Eñ çoq bala Kyiv vilâyetinde – 61, Harkiv vilâyetinde – 41, Donetsk vilâyetinde – 40, Çerniğiv vilâyetinde – 22, Mıkolayıv vilâyetinde – 24, Kyivde – 16, Jıtomır vilâyetinde – 15, Herson vilâyetinde – 15 ve Sumı vilâyetinde – 14 zarar kördi», – dep aytıla haberde.
Baş prokuror ofisiniñ malümatına köre, er kün yapılğan bombardıman ve ateş neticesinde 548 oquv yurtu zarar kördi, 72-si bütünley viran etildi.
«Eñ zor vaziyet Donetsk, Harkiv, Mıkolayıv, Sumı, Kyiv, Herson, Çerniğiv vilâyetlerinde ve Kyivde. Bundan ğayrı, duşmannıñ ateşinden 40-tan çoq bala müessisesi, hususan hastahane, sanat mektepleri, sport obyektleri, kütüphaneler zarar kördi», – dep bildirdi Baş prokurornıñ ofisi.
Prokuratura, faal cenk areketleri ketken rayonlarda ve vaqtınca işğal etilgen topraqlarda ateş açılğan yerlerni baqmağa imkân olmağanı içün bu malümat tam degildir, dep qoştı.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: d3hzcgsd893cx5.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
