Rusiye müessisesiniñ malümatına köre, yarımadada üç uçucısız urıp tüşürildi.
Qayd etmeli ki, avadan telüke aqqında haber etilmedi. Tek Keriç köprü qapatıldı, dep aytılğan edi. Yerli Telegram kanalları şaatlarnıñ malümatına esaslanıp, patlavlar Aqmescitniñ cenübiy qısmında eşitildi, dep bildirdi.
Muarririyet Rusiye tarafınıñ malümatını tasdıqlap olamay. Ukrayına arbiyleri darbe haberini izaatlamadı.
Martnıñ 18-nde Rusiye Mudafaa nazirligi uçucısız Qırımğa ücüm etti, dep bildirgen edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
