Ukrayina prezidenti Volodımır Zelenskıy ukrayin arbiyleri ve mahsus hızmetlerniñ vekillerine "Rusiye ava limanlarına doğru, vaqtında ve semereli ücümleri" içün teşekkür bildirdi. Bu aqta o, avgustnıñ 14-nde video muracaatında ayttı.
"Bizim ukrayin uçaqlarımız keregi kibi çalışa. Amma uçaqnen yapıp olamağan şeyler de bar. Yazıq ki. Başqa bir silâ kerek — raketa silâları. Ve biz ortaqlarımıznen Ukrayina içün uzaq baqışlı qararlarnen çalışmağa devam etemiz, çünki bular bizim ğalebemiz içün uzaq baqışlı qararlardır", — dep qayd etti Zelenskıy.
Devlet yolbaşçısı qoştı ki, "ortaqlarnıñ qararı ne qadar cesür olsa, Putin o qadar az yapa bile".
Ukrayina, ğarbiy ortaqlarını Rusiye territoriyasınıñ terenlerine ücüm etmek içün silânı qullanmağa ruhset bermege çağıra. Uçaqlarnıñ uzun mesafeli ücümleri aqqında şimdilik belli degil.
Azatlıq Radiosı haber etkenine köre, Ukrayina mudafaa quvetleri ve Ukrayina telükesizlik hızmetiniñ uzaq uçuşlı uçaqları gece Rusiye arbiy ava limanlarına ücüm etti. Söz Voronej, Kursk, Savasleyk ve Borisoglebsk ava limanları aqqında kete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
