Poloniya baş naziri Mateuş Moravetskiy, Poloniya akimiyetiniñ fikrince, Avropanıñ Ukrayinanı Rusiye tecavuzından qurtarmaq içün yerine ketirmek kerek olğan 10 maddeden ibaret olğan plan aqqında aytıp berdi.
Plan Politico neşri tarafından yayınlanğan. Moravetskiyniñ bildirgenine köre, hitapnameni Poloniya, Çehiya ve Sloveniya beraberlikte azırlağan.
Bu maddeler:
- Bütün Rusiye banklarınıñ SWIFT sistemasından kesilmesi
- Ukrayinada cenkleşmekten red etken Rusiye askerlerine sığınaq berme siyaseti
- Avropada Rusiye propagandasınıñ tam toqtatılması
- Avropa limanlarında Rusiye gemileriniñ blok etilmesi
- Rusiyege ve Rusiyeden avtomobil alâqasınıñ qapatılması
- Rusiye oligarhlarınıñ biznes müitine sanktsiyalar qoyulması
- Bütün ruslar içün Avropa vizalarınıñ berilmesiniñ toqtatılması
- "Yedinaya Rossiya" fırqasınıñ bütün azalarına sanktsiyalar qoyulması
- Arbiy maqsatlar içün qullanıla bilgen er angi tehnologiyanıñ Rusiyege ihracatınıñ yasaq etilmesi
- Rusiyeniñ bütün halqara teşkilâtlarından çıqarılması.
Evel Poloniya Ukrayinağa barıştırıcı missiyanı yollamağa teklif etken edi, amma NATO-nıñ yaqındaki sammitinde bu mesele muzakere etilmedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: d3hzcgsd893cx5.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
