Cuma künü, fevralniñ 28-nde, NATOnıñ 29 aza memleketiniñ elçileri kirgen Şimaliy atlantik şura Suriyedeki vaziyetten sebep toplaşacaq.
Azatlıq Radiosınıñ bildirgenine köre, toplaşuvnı Türkiye çağırdı.
«Añlaşmanıñ 4-ünci maddesine köre, topraq bütünligi, siyasiy mustaqilligi ya da telükesizligi telükede olğanını tüşüngen er bir ittifaqdaş mesleat yapılmasını istemesi mümkün», – dep aytıla NATO matbuat hızmetiniñ haberinde.
Soñki aftaları Suriye prezidenti Başar Asadnıñ ordusı Rusiyeden destek alıp, memlekette kontrol etmegen soñki isyancı anklavını yoq etmek içün ücüm etti. Böyle etip İdlib vilâyetiniñ cenübinde ve qomşu Aleppo vilâyetinde topraqlarnı zapt etti.
Türkiye, muhalifetke yardım etmek içün Asadnıñ ücümine cevap olaraq İdlibte askerleriniñ sayısını arttırdı. Türkiye ordusınıñ yardımınen silâlı muhalifetniñ ğalebeleri aqqında haber etile. Berilgen malümatqa köre, olar İdlib vilâyetindeki Sarakib şeerini kontrol altında aldı ve Aleppodan Dimaşqqa yolnı qapattı.
Asad ordusınıñ ücümi büyük qaçaq dalğasına yol açtı: BM malümatına köre, dekabrniñ soñundan başlap yarısından çoq bala olğan tahminen 900 biñ kişi evlerini ya da muvaqqat sığınaqlarnı terk etmege mecbur olıp, suvuq qışta evsiz qaldı.
