Türkiye prezidenti Recep Tayyip Erdoğan bildirdi ki, Türkiye azat etilecek ukrainalı siyasiy mabüslerniñ cedvelini Rusiye tarafına berip, meseleniñ muvafaqiyetli çezilmesini bekley.
«UNİAN» haber agentliginiñ malümatına köre, bunı Erdoğan Ukraina prezidenti Petro Poroşenko ile İstanbulda Ukraina ve Türkiye arasında yüksek seviyeli strategik şuranıñ yedinci toplaşuvından soñ keçirgen matbuat konferentsiyasında bildirdi.
«İlk evelâ şunı bildirmek isteyim ki, daa evel eki siyasiy mabüs bizge teslim etilgen edi, bundan soñ olar azat etildi. Bu sefer daa uzun bir cedvel aldıq ve birden onı Rusiye tarafına berdik, bu esnasnı közetip, muvafaq olmamıznı isteyim», – dep qayd etti o.
Türkiye prezidenti Recep Tayyip Erdoğan qırımtatarlarnıñ milliy lideri Mustafa Cemilevden «Putin ile laf etilecek» Kremlniñ ukrainalı esirleriniñ cedvelini bermege rica etken edi.
Keçken sene oktâbr ayında Rusiye işğal etken Qırımda mahküm etilgen Qırımtatar Milliy Meclisiniñ reis muavinleri Ahtem Çiygoz ve İlmi Ümerov Türkiyege teslim etilgen edi. Resmiy olmağan malümatqa köre, Çiygoz ve Ümerovnıñ teslim etilmesi aqqında Türkiye prezidenti Recep Tayyip Erdoğannıñ Rusiye prezidenti Vladimir Putin ile keçirgen körüşüvinde añlaşılğan edi.
Aq qorçalayıcılarnıñ malümatına köre, 60-tan ziyade Ukraina vatandaşı Rusiye ve işğal altındaki Qırımda siyasiy sebeplerden azatlıqtan marum etilgen edi. Ukraina Tış işler nazirligi Rusiyege 300 kere narazılıq bildirip, anda tutulğan ukrainalılarnıñ azat etilmesini talap etti.
