Rusiye uquq qoruyıcıları martnıñ 5-nde tutulğan qırımtatarlarnı terror teşkilâtında iştirak etkeninde qabaatladılar. Bu aqta «Qırım birdemligi» haber ete.
«Tutulğan qırımtatar faalleri ve din adamları Aqmescitteki FSB İdaresine ketirildi. Tahqiqat tedbirleri keçirile. Sıñırlav tedbirleri belgilenecek mahkemeler beklenile. Advokatlardan kelgen ilk malümatqa köre, qırımtatarları Rusiye Federatsiyası Ceza kodeksiniñ 205.5 maddesine istinaden (terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – QA) qabaatlana», – dep aytıla haberde.
Martnıñ 5-nde saba Qırımda qırımtatarlarnıñ evlerinde kütleviy tintüvler oldı. Bağçasarayda tahqiqat tedbirleri «Qırım birdemligi» faalleriniñ evlerinde, Canköy rayonında ise din adamlarınıñ evlerinde keçirildi. Tintüvler 10 qırımtatarınıñ evinde yapıldı.
Tintüvlerden soñ FSB eñ az beş kişini tuttı, olarnıñ arasında sabıq imam Remzi Kurtnezirov bar. Kurtnezirov ekinci derece saqatıdır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
