Noyabrniñ 23-nde Aqmescitte tutulğan qırımtatar faallerini memuriy protokollar tizilgen soñ noyabrniñ 24-nde sabağa yaqın polis bölüklerinden yiberip başladılar. Aynı zamanda bazı tutulğan qadınlarnı qanun koruyıcılar mahkeme oturışına qadar Muvaqqat tutuv izolâtorında qaldırdılar.Bunı uquq koruyıcı, "Qırım birdemligi" cemaat birleşmesiniñ koordinatorı Lutfiye Zudiyeva haber etti.
Onıñ malümatına köre, Aqmescitniñ Jeleznodorojnıy rayon polis bölüginden noyabrniñ 23-nde Rusiye nezaretinde olğan Kiyev rayon mahkemesine kelmege mecburiyeti ile dört qadınnı yibergenler: Arslanova Ayşe, Ümerova Lemara, Zudiyeva Alfiya, Gazançiyan Safinaz.Ve çağına yetmegen Meryem Kulametovanı qartbabasına senet berip yibergenler.
Daa eki qadın ve üçi erkek bu polis bölüginde qaldı: Kulametova Reyhane , Abduramanova Elmaz, Abdurmanov Smail, Çolakçik Server, Abdurazakov Kemal.
Zudiyevanıñ qayd etkenine köre, Aqmesciteniñ Merkeziy rayon polis bölüginde protokollarnı noyabrniñ 24-nde sabağa yaqın tizip başlağanlar.
"Anda şimdi 10 adam tutula. Mesele şunda ki, qırımtatar tercimanı Jeleznodorojnıy polis bolügindeki tutulğanlarğa yarım etken soñ endi mında kelip çıqtı", - dedi Zudiyeva.
Biraz soñra uquq qoruyıcı, beş tutulğan qadın memuriy protokollarnıñ mahkemede baqılmasına qadar muvaqqat tutuv izolâtorlarında qalacaqlarını haber etti: Kulametova Reyhane, Abduramanova Elmaz, Azizova Elvina, Yanikova Fatime, İbragimova Nailâ.
Aqmescitte noyabrniñ 23-nde aqşam Rusiye quvetçileri advokat Edem Semedlâyevni qarşılamaq içün Muvaqqat tutuv izolâtorınıñ binasına kelgen faallerni yaqaladı. 31 kişi yaqalanda, olarnıñ arasında 10 qadın, jurnalistler ve "Qırım birdemligi"niñ mühbirleri. Yaqalanğanlarnı polis bölüklerine alıp kettiler.
