Ukraina prezidenti Volodımır Zelenskıynıñ yardımcısı Andriy Yermak Ukraina ve Rusiye arasında tutulğanlarnıñ deñişüvi eñ yaqın vaqıtta olajaq, dep ümüt ete, dep haber ete Azatlıq Radiosı.
«Şunı ayta bilem ki, eki prezidentniñ telefon subetinde bu mevzu laf etildi, eñ yaqın vaqıtta olacağına ümüt etem. İş devam ete, emin oluñız», – dedi Yermak «İnterfaks-Ukraina» Ukraina haber agentligine.
Yermak Ukraina ve Rusiye prezidentleri ne vaqıt laf etkenlerini aytmadı.
Hatırlatamız, avgustnıñ 30-nda gece Ukraina ve Rusiye arasında tutulğan şahıslarnıñ deñişüvi olacağına dair ilk haberler peyda oldı. Bu aqta keçken çağırılış halq deputatı Artur Palatnıynıñ yardımcısı Anna İslamova yazdı, onıñ malümatını Ukrainanıñ yañı baş prokurorı Ruslan Râboşapko paylaştı. Daa soñra bu yazı yoq oldı.
Ukraina telükesizlik hızmetiniñ spikeri Olena Ğitlânska avgustnıñ 30-nda saba bildirdi ki, «reinelerni deñişüv boyunca zor muzakereler esnası devam ete». O, jurnalistlerni «yañlış malümat tarqatmamalarına» çağırdı. Aynısını Ukraina prezidenti Volodımır Zelenskıynıñ ofisi de yazdı.
Daa soñra Ukraina telükesizlik hızmeti Ukraina ve Rusiye arasında tutulğan şahıslarnı deñişüv künü belgilengen soñ onı kütleviy haber vastalarına bildirmege vade etti.
Kütleviy haber vastaları Rusiye ve Ukraina «33-ke 33» deñişüv aqqında añlaştılar, dep bildirgen ediler. Ukraina prezidenti Volodımır Zelenskıy Ukraina ve Rusiye arasında tutulğan şahıslarnı deñişüvniñ «birinci neticeleri» eñ yaqın vaqıtta olacağına ümüt etkenini bildirgen edi.
