İlk küzniñ 13-ne keçer gecesi Poloniya-Ukrayina sıñırında Rusiyeniñ uçucısız uçaqları ücüm etken soñ, Rusiye tarafından vaziyetniñ kerginleşüvi "kerçek faktqa çevirile". Bunı Poloniya baş naziri Donald Tusk bildirdi. O, ükümet telükesizlik merkezinde acele toplaşuvnı çağırdı.
"Rusiye Federatsiyası tarafından areketlerniñ kerginleşüvi kerçek ola. Rusiyeliler daa telükeli tehnika qullanmağa azır — men mında uçucısız uçaqlarnı aytam, olarnıñ uzaqlığı ve doğrulığı telüke doğura", — dep bildirdi Tusk. Onıñ aytqanına köre, Ukrayina territoriyasında 13 obyekt zarar kördi.
Poloniya baş naziri yaqın aftalar ve aylar Moskva tarafından "pek intensiv areketler" deviri ola bile, dep tenbiledi. Onıñ aytqanına köre, vaziyetniñ kerginleşüvi Poloniyağa tesir ete bile. Bu vaziyette Varşava ve onıñ NATO ittifaqdaşları beraber cevap bermege azır olmaq kerekler.
Tusk şunı da qayd etti ki, yaqın aylarda sıñır keçitlerinde çalışmaq içün mahsus rejim kerek olacaq.
İlk küzniñ 13-nde Rusiye ücüminden sebep Kıyivden Poloniyağa ketken tren toqtatıldı ve yolcular qısmen tahliye etildi.