Türkiyedeki yer teprenüvinde elâk olğanlarnıñ sayısı 3381 oldı, dep bildire Anadolu agentligi AFAD (fevqulâde vaziyetler idaresiniñ) malümatına esaslanıp. 20 436 insan yaralandı. 65 memleket Türkiyege yardımını teklif etti.
Yer teprenüvinden zarar körgen Suriyede 769 insan elâk oldı ve 1448 kişi yaralandı, dep bildirdi SANA agentligi memleketniñ sağlıq nazirligi bergen malümatqa esaslanıp. Al Arabiya telekanalı Suriyede 1,4 biñden çoq qurban aqqında bildirdi.
Fevralniñ 7-nde saba merkeziy Türkiyede 5,3 küçünen zelzele qayd etildi. Avropa-Aq deñiz zelzeleşınaslıq merkeziniñ malümatına köre, merkez 10 km terenlikte edi. Başta merkez 5,6 küç aqqında bildirgen edi, lâkin soñra malümatnı deñiştirdi.
Türkiye ve Suriyede küçlü zelzele: 1600-den ziyade adam elâk oldı (fotoresimler)
Fevralniñ 6-na keçer gecesi Türkiyede küçlü bir zelzele oldı. Merkez Kahramanmaraş oldı, Gaziantep şeerinden 30 km ve Suriye sıñırından 90 km mesafede: küçü 7,8 derecege çıqtı. Zelzele qomşu memleketlerde is etildi: Lübnan, Ermenistan, Suriyede.
Türkiyede tahminen 2,8 biñ bina yıqıldı: şaatlarnıñ aytqanına köre, bir çoq ev, hususan yıllar evelsi qurulğan soyları, bir saniyede yıqıldı. Türkiye prezidenti Recep Tayyip Erdoğan yer teprenüvi 1939 senesi olğan Erzincan zelzelesinden soñ eñ büyük felâket oldı. Türkiyede fevralniñ 13-ne qadar milliy matem ilân etildi.
Fevralniñ 6-nda Türkiyede 7,6 magnitudalı ekinci zelzele oldı. Onıñ merkezi Kahramanmaraşnıñ Elbistan ilçesi oldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.