Türkiyede Ukrayina ve Rusiye delegatsiyaları arasında aytışuvlar başlandı. Olarnıñ çerçivesinde gumanitar meselelerniñ muzakere etilmesi ve ateşniñ toqtatılması aqqında kelişmege planlaştırıla.
Aytışuvlar İstanbuldaki Dolmabahçe sarayında keçirile. Olar jurnalistler içün qapalı.
Ukrayina telekanallarınıñ yaynında Ukrayina TİN başı Dmıtro Kuleba bildirgeni kibi, Kıyivniñ azğariy vazifesi "gumanitar meselelerni al etmektir".
"Maksimum programma ateşni toqtatamaqtır. Biz adamlarnı, topraqlarnı ve suverenitetni satmaymız. Bizim noqta-i nazarımız qattıdır", - dedi Kuleba.
Türkiye prezidenti Recep Tayyip Erdoğan aytışuvlar yerine keldi. Evel haber etilgeni kibi, o aytışuvlardan evel er bir delegatsiya ile ayrı körüşecek edi.
Aytışuvlar vaqtında Rusiye Ukrayinanıñ "denetsifikatsiyasını" artıq talap etmey ve Ukrayina bitaraf statusına saip olsa, memleketniñ Avropa Birligine qoşulması ile razıdır. Bunıñ aqqında dört menbağa atfı etip Financial Times neşri haber ete.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
