Türkiye akimiyeti dekabrniñ 23-nde Ankaranıñ Esenboğa ava limanından uçqan şahsiy biznes-jetnen bağ coyuldı, uçaqta Libiya Baş ştabınıñ yolbaşçısı ve daa dört yolcu bar edi, dep haber etti.
Soñra uçaq parçaları tapıldı, dep bildirildi.
Ankaradan 74 kilometr uzaqtaki Haymana rayonında Falcon uçağından acele qonuv istegi keldi, amma bundan soñ uçaqnen bağ qurulamadı, dep bildirdi X içtimaiy ağında Türkiye iç işler naziri Ali Yerlikaya. Onıñ haber etkenine köre, biznes-jet Ankaradaki Esenboğa ava limanından Tripolige yol almaq içün yerli saatnen 20:10 uçtı, bağ ise tahminen 40 daqqadan soñ coyuldı.
Uçaqta yolcular arasında Libiya generalı Mohammed Ali al-Haddad bar edi, dep qoştı Ali Yerlikaya. Libiya ükümeti Libiya ordusınıñ Baş ştab yolbaşçısınıñ Ölümi aqqında haber aldı, dep bildirdi. Yanında olğan şahıslar arasında diger arbiy memurlar da bar edi.
Bir qaç Türkiye kütleviy haber vastası uçaq signal bergen yer yaqınlarında patlav ışığı körüngen levhanı kösterdi.
Türkiyeniñ BM qoltutqan Tripoli ükümetinen sıqı bağları bar, oña iqtisadiy ve arbiy yardım köstere, dep qayd ete France-Presse agentligi.