Rusiye Federatsiyasınıñ Tış işler nazirliginiñ umumavropa işbirligi departamentiniñ reberi Nikolay Köbrinets İstanbulda musafirhane odasında ölü tapıldı, dep haber ete NTV Türkiye telekanalı.
Kütleviy haber vastalarınıñ malümatına köre, diplomat İstanbulğa bir kün evelsi elçiler körüşüvine keldi. Zenaatdaşları saba körüşüvine kelmegeni içün onen bağlanmağa tırıştı, amma bir haber alamadı.
Soñra musafirhane odasında ölü tapıldı. Adise yerine kelgen ekimler diplomat can bergenini ayttı. Bu, oktâbrniñ 13-nde saba saat 9-da oldı.
Polis tahqiqat başlattı.
Prokuror ve tahqiqat gruppasınıñ ilk malümatına köre, Köbrinetsniñ yüregi toqtadı. Tahqiqattan soñ diplomatnıñ naaşı ölümniñ sebebini ögrenmek içün mahkeme tibbiyeti institutınıñ morgüna berilecek.
Rusiye Tış işler nazirligi 62 yaşında diplomatnıñ ölümini tasdıqladı. Köbrinets oktâbrniñ 12-nde vefat etti. Aynı vaqıtta ölümniñ sebepleri ya da diger tafsilâtları aydınlatılmay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
