Türkiye devlet memurları qırımlı siyasiy mabüslerniñ azat etilüvi aqqında muzakereler keçire, çünki Ukrayına ve qırımtatarlardan muracaatlar bar. Bu aqta Türkiye ombudsmeni Şeref Malkoç QIRIM.News intervyüsında ayttı.
«Kelgen muracaatlarnı taraflarğa yollap, çezüv yollarını tapmağa tırışamız», – dep qayd etti o.
Malkoç Rusiye ziyareti vaqtında qırımtatar siyasiy mabüslerini yoqlaycaqmı sualine Malkoç böyle cevap berdi: «Rusiyeden müsbet cevap kelse, bu meseleni ğayrıdan baqarmız. Çünki Ukrayınağa barğanda (körüşüv) planımız bar edi».
Malkoç qayd etkenine köre, Türkiye cenkniñ tez vaqıtta adaletli barışıqnen, Qırımnen beraber bütün işğal etilgen topraqlarnıñ azat etilüvinen ve halqara uquqqa köre Ukrayına topraq bütünliginiñ temin etilüvinen bitmesini istey.
Qırımtatar resurs merkezi, bugünki künde azatlıqtan marum etüv yerlerinde bulunğan 194 qırımlı siyasiy mabüs qayd etilgenini bildirdi, olardan 134 qırımtatardır.
Ukrayına Prezidentiniñ Qırım Muhtar Cumhuriyetindeki Temsilciliginiñ malümatına köre, 2024 senesi fevralniñ 19-na qadar Rusiyede 208 qırımlı siyasiy mabüs tutula, olardan 125 qırımtatardır.
«Qırım uquq qoruyıcı gruppası» idaresiniñ reisi Olğa Skrıpnık bildirgenine köre, eñ az 200 Ukrayına vatandaşı Qırımda uydurılğan siyasiy davalar boyunca apiste buluna.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
