Türkiye ve Suriyede zelzeleler neticesinde elâk olğanlarnıñ sayısı 12 049 insan oldı, daa 77 779 kişi yaralandı. Bu aqta NBC News yaza.
Türkiyede, prezident Recep Tayyip Erdoğannıñ aytqanına köre, eñ az 9 057 kişi elâk oldı. Daa 52 979 insan yaralandı, dep bildire Türkiye fevqulâde vaziyetler nazirligi, sekiz biñ kişi ise çıqarılıp qurtarıldı.
Suriyede eñ az 2 992 kişi elâk oldı. Memleketniñ sağlıq nazirligi ve «Beyaz demir başlıqlarınıñ» malümatına köre, 24 800-den çoq insan yaralandı.
Türkiye lideri yaralanğanlarğa acele yardım kösterilüvinde eksiklikler olğanını qabul etti. Aynı vaqıtta «böyle felâketke azır olmaq mümkün degil», dep qayd etti.
Erdoğan, zelzele neticesinde evsiz qalğan insanlarnıñ açuvını kördi. Bazıları yardım pek yavaş kele, dep şikâyet etkenler. Suriyede de buña oşağan şikâyetler yapıldı.
Qurtarıcılar qıdırmağa devam ete, amma suvuq ava ve tekrarlanğan yer teprenüvleri işlerini zorlaştıra.
Onlarnen memleket acele gumanitar yardım köstere, qıdıruv gruppaları ve yardım vastaları yollandı. Dünya sağlıq teşkilâtı zelzeleden 23 million qadar insan zarar köre bile, dep tenbiledi.
7,8 magnitudalı yer teprenüvi Türkiyede 1939 senesinden berli eñ küçlü oldı.
