Fevralniñ 6-nda Türkiye ve qomşu Suriyede zelzele neticesinde elâk olğanlarınıñ sayısı 2300 adam oldı, dep haber ete yerli memurlar ve ekimler.
Türkiye başlıqları eñ az 1500 adam öldi dep bildirdi, aynı zamanda Suriyede 800 adam elâk oldı.
Suriyedeki Milliy zelzele merkeziniñ reberi Rayed Ahmed 7,8 büyükligindeki zelzeleni "merkezniñ tarihında qayd etilgen eñ büyük zelzele" adlandırdı.
Bir sıra memleket, şu cümleden Ukrayina Türkiyege yardım etmek azır olğanını bildirdi.
Türkiye ve Suriyede küçlü zelzele: 1600-den ziyade adam elâk oldı (fotoresimler)
ABD devlet kâtibi Entoni Blinken ABD artıq yardım etip başlağanını bildirdi.
"Zelzeleden zar körgenlerge yardım etmege azırmız", - dedi o.
Suriye ükümeti de dünya toplulığını olarğa yardım etmege çağırdı.
BMT-nıñ hadimleri yardım etmek içün Türkiye ve Suriye ile işbirlik ete, dedi Antoniu Güterriş.
"Dünya toplulığı bu felâketten zarar körgen biñlernen adamlarğa yardım etecegini bekleymiz", - dedi o.
7,8 büyükliginden zelzele Türkiyeniñ cenüp şarqında ve qomşu Suriyede fevralniñ 6-na keçken gecesi yüz berdi.
Zelzeleniñ merkezi Türkiyeniñ Gaziantep şeeriniñ şimalinde, Suriye sıñırına tahminen 90 km uzaqlıqta edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
