Türkiye ve Suriye sıñırında yañı zelzele yüz berdi, zelzeleşınaslar Rihter şkalası üzre 6,5 v6 5,8 büyükliginde sarsıntılar qayd etti. Bunı A Habr televizion kanalı AFAD agentligine atfı etip bildire.
Fevralniñ başında olğanı kibi yañı zelzeleniñ merkezi kene Hatay eyaletinde olğan. Sarsıntılar neticesinde eyalet elektrik energiyasız qalğan, bundan evelki zelzele vaqtında zarar körgen bazı evler ise yıqılğan. Hatay şeer başınıñ bildirgeni kibi, dağıntılar tübünde adamlar bar eken.
CNN Türk televizion kanalınıñ malümatına köre, Hatay eyaletiniñ Samandan şeerinde bir qaadı elâk olğan, Defne şeerinde ise daa eñ az dört adam dağıntılar tübünde qalğan. Bundan ğayrı Türkiye devlet başınıñ muavini Fuat Oktaynıñ bildirgeni kibi, eñ az sekiz adam memleketniñ cenüp-şarqında yaralanğan.
Bir qaç adam Suriyeniñ El-Atarib şeerinde zarar körgen, dep haber ete Al Jazeera televizion kanalı.
Türkiyeniñ cenüp-şarqındaki zelzelelerniñ aqibetleri: biñlernen ölü, biñlernen insan dağıntılar altında qala (fotoresimler)
Fevralniñ 6-nda Türkiyede yüz bergen zelzeleden soñ dağıntılar tübünden 114 biñ adam qurtarılğan, 41,1 biñ adam elâk olğan.
Türkiyeniñ cenüp şarqında ve qomşu Suriyede fevralniñ 6-na keçken gecesi 7,8 büyükliginde zelzele yüz berdi. Zelzeleniñ merkezi Türkiyeniñ Gaziantep şeeriniñ şimalinde, Suriye sıñırına tahminen 90 km uzaqlıqta edi. Yerastı sarsıntıları bir qaç Türkiyeniñ bölgesi Adana, Ankara, Antalya, Gaziantep, Kayseri, Mersin, Trabzon, Urfada ve Suriye, Lübnan, İraq, Mısır, Yunanistan, Qıbrız, Gürcistan, Eremenistan ve İsrailde duyuldı,
Türkiye prezidenti Recep Tayyip Erdoğannıñ sözlerine köre, zelzele 1939 Erzincan zelzelesinden bugünge qadar Türkiye tarihınıñ eñ büyük felâketidir.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.