Link açıqlığı

Saatnıñ esas haberi

Aq qorçalayıcılar Türkiye ombudsmenini qırımlı siyasiy mabüsler ve hırsızlanğan ukrayınalılarnıñ deñişimine yardım etmesine çağıra


Türkiye, Ukrayına ve qırımtatar bayraqları
Türkiye, Ukrayına ve qırımtatar bayraqları

Bu yıl yanvar ayında Ukrayına ombudsmeni Dmıtro Lubinets Rusiye ombudsmeni Tatyana Moskalkovanen körüşti

«Qırım ğayesi» cemaat birleşmesi Türkiye ombudsmeni Şeref Malkoçnı işğal etilgen Ukrayına topraqlarında hırsızlanğan qırımlı siyasiy mabüs ve vatandaşlarnıñ deñişimi ve azat etilüvine yardım etmesine çağıra. Bu aqta Qırım.Aqiqat mühbiri bildirdi.

«Türkiye ombudsmeniniñ ofisi teklif etken üç basamaqlı gumanitar areketler planı bugün reine olğan vatandaşlarnıñ taqdirinen bağlı olmalı. İnsan aqları halqara institutları bu insanlarnı azat etüv işleri kerek olğanına açıq şekilde qoltutmalı», – dep tüşüne «Qırım ğayesiniñ» vekilleri.

«Qırım ğayesiniñ» muracaatında qayd etilgenine köre, onıñ esaplarına köre, tek Aqmescitte 100-den 150-ge qadar Herson ve Zaporijjâ vilâyetleriniñ sakinleri tutula, olarnı hırsızlap, uzun vaqıt apiste «inkommunikado» (tış dünyanen bağlardan kesilgen insan – QA).

Yanvarniñ 16-nda Türkiye ombudsmeni Şeref Malkov bildirgenine köre, olğan körüşüvde Ukrayına ombudsmeni Rusiye tarafına 800 insanlıq cedvel berdi, Rusiye ombudsmeni Ukrayına ombudsmenine 200 insanlıq bir cedvel berdi. Rusiye kütleviy haber vastaları bunı umumen 1 biñ insanlıq deñişimniñ azırlığı dep adlandırdı.

Bu yıl yanvar ayında Ukrayına ombudsmeni Dmıtro Lubinets Rusiye ombudsmeni Tatyana Moskalkovanen körüşti.

Soñra Ukrayına ombudsmeni Dmıtro Lubinets Türkiye prezidenti Recep Tayyip Erdoğannen körüşip, qırımlı siyasiy mabüslerni Rusiye apsinden azat etüv meselesini muzakere etti.

Ukrayınanıñ arbiy esirlerge munasebet koordinatsion merkeziniñ malümatına köre, 2022 senesi Rusiye esirliginden 1596 arbiy ve Ukrayına vatandaşı azat etildi.

ZMINA insan aqları merkezi Qırımdaki menbalarına esaslanıp, rusiyeliler işğal etilgen topraqlardan işğal altındaki Qırımğa qanunsız çıqarğan ukrayınalılar Aqmescit SİZOsında ayrı binalarda tutula, dep bildire. Olar işkencege oğratıla, advokatlar kirsetilmey.

Hatırlatamız, Rusiye Federatsiyası işğal etken Ukrayına topraqlarından hırsızlanğan ukrayınalılarğa qarşı işkence aqqında qırımtatar faali ve siyasetçi Nariman Celâl tarif etken edi.

Rusiye Federatsiyasınıñ mahkemesi tarafından «Noman Çelebicihan batalyonında» iştirak etkeninde qabaatlanıp, sert rejimli koloniyada beş yıl qalmasına üküm etilgen Herson vilâyetiniñ 31 yaşında sakini Ruslan Abdurahmanov da Rusiye uquq qoruyıcıları tarafından işkencege oğratılğanını bildirdi.

«Agentstvo» Rusiye neşiri, Aqmescit SİZOsında işğal etilgen Ukrayına topraqlarında Rusiye ordusı ya da mahsus hızmetleri tarafından zapt etilgen 50-den 100-ge qadar ukrayınalı tutula, dep bildirgen edi.

Rusiye akimiyeti ve mahkemesi işğal etilgen topraqlarda ukrayınalılar tutulğanını tasdıqlay, lâkin sayısını aydınlatmay.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG