Türkiye ateşkes ve turğun barışıqqa irişmek içün isse qoşmağa azır, şu cümleden muzakere meydanı olmaq imkânına da azır, dep bildire prezident Recep Tayip Erdoğannıñ aytqanlarını onıñ idaresi.
Qayd etilgenine köre, Erdoğan Frenkistan prezidenti Emmanuel Makronnen telefonda laf etti. Liderler Türkiye ve Frenkistan arasında eki taraflı munasebetlerni, regional ve global meselelerni, hususan Rusiyeniñ Ukrayinağa qarşı cenkini muzakere ettiler.
Erdoğannıñ bildirgenine köre, «Ukrayina ve Rusiye arasında daimiy barışıq muzakerelerini başlatmaq ve Ukrayinanı tiklemek ceryanlarını nazik şekilde amelge keçirüvde işbirligini devam etmek müimdir».
Soñra Türkiye prezidenti Rusiye prezidenti Vladimir Putinnen telefonda laf etip, ateşniñ toqtatıluvı kerçek barışıq muzakerelerine doğru bir adım ola bilir edi, dep qayd etti, dep bildirdi Türkiye lideriniñ memuriyeti.
Rusiye prezidenti Vladimir Putin mayısnıñ 15-nde İstanbulda Ukrayinanen «doğrudan-doğru muzakerelerni» ğayrıdan başlatmağa teklif etti, bu aqta o, jurnalistlernen subet vaqtında ayttı. Aynı vaqıtta Ukrayina «istegenler koalitsiyasınıñ» körüşüvi neticesinde ittifaqdaşlarınen beraber mayısnıñ 12-nden başlap şartsız ateşkesni teklif etti, amma Rusiye prezidenti buña cevap bermedi.
ABD prezidenti Donald Trump Truth Social içtimaiy ağında Putinniñ teklifine cevap berip, «Rusiye ve Ukrayina içün büyük kün» aqqında ayttı.
Kyivde «istegenler koalitsiyasınıñ» toplaşuvında mayısnıñ 12-nde başlaması beklenilgen 30 künlik tolu ve şartsız ateşkes qararı alınğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.
