Türkiye Tış işler naziri Hakan Fidan bazarertesi künü Ukrayinadaki vaziyetni muzakere etmek içün Rusiyege baracaq, dep haber ete Anadolu haber agentligi.
Agentlikniñ malümatına köre, ziyaret çerçivesinde Türkiye Tış işler naziri Rusiye prezidenti Vladimir Putinnen ve Rusiye Tış işler naziri Sergey Lavrovnen körüşecek.
O, Türkiyeniñ «Rusiye-Ukrayina cenki meselesinde adaletli ve qaviy bir barışıq olmasına qoltutqanını, bu esnasta olğan ilerilevden memnün qalğanını» qayd etmek niyetinde.
Fidan diger Rusiye memurları, hususan prezident yardımcısı Vladimir Medinskiynen körüşmek kerek.
TASS Rusiye agentligi yazğanına köre, ziyaret mayısnıñ 26-27-nde olacaq.
Mayısnıñ 16-nda İstanbulda Ukrayina ve Rusiye arasında keçirilgen muzakereler esasında biñge biñ formatında esir deñişüvi aqqında añlaşıldı.
Eki taraf üç yıl içinde ilk sefer muzakere masası başına oturdı. Ukrayina ateşni 30 künge toqtatmağa talap etti. Lâkin Rusiye tarafı topraq isteklerinden öyle de vazgeçmedi – dört Ukrayina vilâyetinde öz suverenitetiniñ tanılmasını istey, Moskva bunı ateş toqtatıluvınıñ şartı olaraq bildire.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
