Keçken yılnıñ soñunda Türkiye Ukrayınağa kassetalı top bombalarını berdi, dep haber ete Foreign Policy mecmuası Amerika ve Avropa memurlarınıñ malümatına esaslanıp. Neşirniñ malümatına köre, Kyiv bunı ABDden istegen edi.
Laf suvuq cenk vaqtında Amerika Birleşken Devletlerinen yapılğan añlaşmağa köre Türkiyede işlep çıqarılğan eki maqsatlı adiy bomba (Dual-Purpose Improved Conventional Munitions, DPICM) aqqında kete, dep yaza neşir. Olar zırhlı tehnikanı yoq etmek içün qullanıla – ateş açılsa, er biri 88-den çoq kiçik bombağa bölüne.
Kassetalı silâ 2010 senesi halqara şartnamenen yasaqlanğan, amma Ukrayına, Türkiye, ABD ve Rusiye bu şartnamege qoşulmağan ediler.
Neşir menbalarınıñ malümatına köre, bir qaç ay devamında Ankara Kyivge kassetalı bomba bergenini gizlemege tırıştı. ABD Ukrayınağa mezkür silâ bermege razı olmağan soñ, Türkiye Kyivniñ bu bombalarnı ala bilecek yekâne yer oldı. Amerika qanunları DPICM ihrac etilüvini yasaqlay – parçalanmağan bombalar çoq, uzun yıllar devamında barışıqsever eali içün telükeli ola bile.
Jurnalistlerniñ bildirgenine köre, silâ noyabr ayında yollandı, lâkin uruşta qullanılamı belli degil.
«Bu, Türkiyeniñ Rusiye ile bazı meselelerde uzlaşmağa tırışsa da, Ukrayınağa pek müim arbiy yardım köstergenini isbatlay», – dep ayttı menbalardan biri neşirge.
Türkiyeniñ Washington elçihanesi ve Ukrayına Mudafaa nazirligi Foreign Policyniñ kassetalı bombalarnıñ berilüvinen bağlı malümatnı izaatlamaq muracaatlarına cevap bermedi.
Aq qorçalayıcı teşkilâtnıñ malümatına köre, Rusiye ordusı Ukrayınağa qarşı ücüm vaqtında kassetalı silânı çoq qullandı, bundan vatandaş ealisi de bayağı zarar kördi. Human Rigths Watch maruzasına köre, Ukrayına da bu bombalarnı qullandı, lâkin Rusiye olarnı daa çoq vatandaşlarğa qarşı işletti (Rusiye Mudafaa nazirligi bunı inkâr ete). Amnesty International maruzasında böyle bombalarda yüzlernen Harkiv sakini can berdi, dep aytıla.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
