Türkiye Qırımda ve Rusiye topraqlarında tutulğan ukrain ve qırımtatar siyasiy mabüsleriniñ azat etilüv meselesinde «semereli ortaqtır».
Böyle fikirni «Ukrinform» neşrine Ukraina millet vekili, Turkiye ile parlamentlerara gruppasınıñ reislerinden biri Rustem Umerov bildirdi.
«Türkiye, biz onıñ vastası ile tevqif etilgenler siyasiy mabüsler olğanı fikrini yetiştirmek ve olarnı deñiştirmek ya da azat etmek tırışqanımız strategik ve semereli ortaqlarımızdan biridir. Eminmiz ki, Turkiye diplomatları bizim noqta-i nazarımıznı muhaliflerimizge yetiştireler. Türkiye bizim tarafdarımız, o biznen aynı fikirde, suverenitetimiz ve topraq bütünligimizni destekley, Qırımnıñ muvaqqat işğali tanımay, amma aynı zamanda Rusiye ile siyasiy, diplomatik ve iqtisadiy aplâqaları bar», – dedi Umerov.
Umerovnıñ fikrince, bar olğan kerginlikni eksiltmek meselesinde Türkiyeniñ Rusiyege tesiri ABD-den daa tesirli ola bilir.
Ukraina prezidenti Volodmır Zelenskıy, Türkiye Kyivniñ azat etmege tırışqan siyasiy mabüslerniñ cedvelini Rusiye tarafına bergenini bildirdi.
Rusiye Tış işler naziri Sergey Lavrov işğal altındaki Qırımda insan aqlarınıñ bozuluvı aqqında laflar uydurıla, dep bildirgen edi. Qırımnıñ Rusiye yolbaşçısı Sergey Aksenov Qırımda siyasiy mabüsler «kesen-kes yoq», dep israr ete.
